ehimalayatimes.com · 10/14/2026 · 0 views

सैनामैनामा २५२ योजना सम्पन्न, बजेट खर्च ६४ प्रतिशत

रुपन्देही । रुपन्देहीको सैनामैना नगरपालिकाले आर्थिक वर्ष २०८२/८३ मा विकास निर्माण, स्वास्थ्य, कृषि, शिक्षा तथा सामाजिक सुरक्षालगायत क्षेत्रमा २५२ वटा योजना सम्पन्न गरेको छ। नगरपालिकाको सामाजिक परीक्षण प्रतिवेदनले पूर्वाधार विकाससँगै सेवा प्रवाह, सुशासन र नागरिकको जीवनस्तर सुधारमा भएका उपलब्धि सार्वजनिक गरेको हो।

सामाजिक परीक्षण कार्यक्रममा प्रस्तुत प्रतिवेदनअनुसार आर्थिक वर्षमा नगरपालिकाका लागि १ अर्ब ३४ करोड ३७ लाख ३९ हजार रुपैयाँ बजेट स्वीकृत भएकामा ८५ करोड ९५ लाख ९३ हजार रुपैयाँ खर्च भएको छ। यो कुल बजेटको ६४ प्रतिशत हो।

त्यस्तै, आन्तरिक आयतर्फ ८ करोड ५३ लाख रुपैयाँ संकलन गर्ने लक्ष्य राखिएकामा ८ करोड २७ लाख १६ हजार रुपैयाँ संकलन भएको प्रतिवेदनमा उल्लेख छ।

नगर अस्पताल सञ्चालनदेखि स्वास्थ्य सेवाको विस्तार

स्वास्थ्य सेवातर्फ पर्रोहा स्वास्थ्य चौकीलाई स्तरोन्नति गरी सैनामैना नगर अस्पतालका रूपमा सञ्चालन गरिएको छ। अस्पतालमा एक्सरे सेवा पनि सुरु गरिएको प्रतिवेदनमा उल्लेख छ।

नसर्ने रोगसम्बन्धी सचेतना कार्यक्रममा ९०० जनाको सहभागिता रहेको छ। क्यान्सर, मिर्गौला रोग तथा मेरुदण्डमा चोटपटक लागेका १८१ जनालाई थप उपचारका लागि सिफारिस गरिएको जनाइएको छ।

सडक, नाली र खेलकुद पूर्वाधारमा प्रगति

पूर्वाधार विकासअन्तर्गत नगरपालिकाले २ हजार ७६३ मिटर सडक कालोपत्रे तथा मर्मत गरेको छ। त्यस्तै, १६ हजार ५७० मिटर सडक स्तरोन्नति र १० हजार ७८३ मिटर नाली निर्माण गरिएको प्रतिवेदनमा उल्लेख छ।

नगरमा चक्रपथ निर्माणको काम अघि बढाइएको छ। मुर्गियामा राष्ट्रियस्तरको रङ्गशाला निर्माण तथा ११ वटै वडामा खुला व्यायामशाला स्थापना गर्ने काम पनि गरिएको जनाइएको छ।

६ हजार ३०० किसानलाई तरकारीको बीउ वितरण

कृषि क्षेत्रको उत्पादन र किसानको आयआर्जन बढाउन बीउबिजन वितरण, तालिम तथा भण्डारणमा सहयोग गरिएको छ। तरकारीको बीउ वितरणबाट ६ हजार ३०० किसान लाभान्वित भएका छन्।

त्यस्तै, ४८६ किसानलाई २० वटा स्थलगत तालिम प्रदान गरिएको छ। ५० प्रतिशत अनुदानमा २८ टन आलु भण्डारण गर्दा ३४० घरपरिवार लाभान्वित भएको प्रतिवेदनमा उल्लेख छ।

७ हजारभन्दा बढी लाभग्राहीलाई सामाजिक सुरक्षा भत्ता

सामाजिक सुरक्षातर्फ नगरपालिकाले ७ हजार ५६८ लाभग्राहीलाई २९ करोड १० लाख ५६ हजार रुपैयाँ वितरण गरेको छ। बैंकसम्म पुग्न नसक्ने लाभग्राहीलाई घरमै भत्ता उपलब्ध गराउने व्यवस्था गरिएको प्रतिवेदनमा जनाइएको छ।

भूमिसम्बन्धी सेवा प्रवाहअन्तर्गत १६५ जनालाई जग्गाधनी प्रमाणपुर्जा वितरण गरिएको छ। त्यस्तै, सामुदायिक विद्यालयलाई २९२ सेट फर्निचर वितरण गरिएको छ।

वडा नम्बर १० स्थित एकलापहाडमा फोहोरमैला प्रशोधन केन्द्र निर्माणको प्रक्रिया पनि अघि बढाइएको नगरपालिकाले जनाएको छ।

सुशासन र सेवा प्रवाहबारे छलफल

रुपन्देही मिडिया नेटवर्क प्रालिका तर्फबाट प्रस्तुत सामाजिक परीक्षण प्रतिवेदनमाथि भएको छलफलमा नगरपालिकाका जनप्रतिनिधि, कर्मचारी तथा सरोकारवालाले विकास निर्माण र सेवा प्रवाहका विषयमा धारणा राखेका थिए।

कार्यक्रममा प्रशिक्षक रामचन्द्र अर्यालले प्रतिवेदन प्रस्तुत गर्दै नगरपालिकामा भएका काम, सुशासनको अवस्था र जनप्रतिनिधिको भूमिकाबारे जानकारी गराउनुभएको थियो। उहाँले नगरपालिकामा सुशासनको अवस्था राम्रो रहेको र जनप्रतिनिधिमा इमानदारी देखिएको उल्लेख गर्नुभएको थियो।

कार्यक्रम कार्यवाहक नगरप्रमुख बिना रानाको अध्यक्षतामा सम्पन्न भएको थियो। कार्यक्रममा निमित्त प्रमुख प्रशासकीय अधिकृत टीकाराम शर्मा, वडाध्यक्षहरू, प्रशासकीय अधिकृत तथा सूचना अधिकारी, लेखा अधिकृत शिवलाल अर्याललगायत शाखा प्रमुखहरूको सहभागिता थियो। कार्यक्रमको सञ्चालन केशवराज अर्यालले गर्नुभएको थियो।

समापनमा कार्यवाहक नगरप्रमुख रानाले सामाजिक परीक्षण प्रतिवेदनमा औँल्याइएका कमीकमजोरी भए सच्याउँदै अघि बढ्ने बताउनुभयो। नगरपालिकाको विकास र सेवा प्रवाहलाई थप प्रभावकारी बनाउन सबै पक्षसँग सहकार्य गरेर अघि बढ्ने प्रतिबद्धतासमेत उहाँले व्यक्त गर्नुभयो।