ehimalayatimes.com · 10/14/2026 · 0 views

अब हुलाकमार्फत घरमै आइपुग्नेछ नेपाल टेलिकमको सिमकार्ड

काठमाडौं । नेपाल टेलिकमका ग्राहकले अब हुलाक सेवामार्फत घरमै सिमकार्ड प्राप्त गर्न सक्ने भएका छन् । नेपाल टेलिकम र हुलाक सेवा विभागको सहकार्यमा बुधबारदेखि सिमकार्ड घरमै पुर्‍याउने सेवा सुरु गरिएको हो ।

हुलाक सेवा विभागमा बुधबार आयोजित कार्यक्रममा सञ्चार तथा सूचना प्रविधिमन्त्री डा. विक्रम तिमल्सिनाले सेवाको शुभारम्भ गर्नुभयो । उहाँले हुलाक सेवामार्फत सिमकार्डसमेत प्राप्त गर्नुभएको थियो ।

सेवाको शुभारम्भ गर्दै मन्त्री तिमल्सिनाले हुलाक सेवाको देशव्यापी सञ्जालको उपयोग गरी सिमकार्ड वितरणलाई थप प्रभावकारी बनाउन निर्देशन दिनुभयो । उहाँले सेवाग्राहीलाई तोकिएको समयभन्दा अगावै सिमकार्ड पुर्‍याउने प्रयास गर्न र वितरणमा लाग्ने समय तथा सेवाग्राहीको सन्तुष्टिका आधारमा सेवामा सुधार गर्दै लैजानुपर्नेमा जोड दिनुभयो ।

हुलाक सेवाको क्षमता विस्तार गरी भविष्यमा एक–दुई दिनको सट्टा केही घण्टाभित्रै सामग्री डेलिभरी गर्न सक्ने व्यवस्था गरिने पनि उहाँले बताउनुभयो । विशेषगरी सहरी क्षेत्रमा छिटो सेवा उपलब्ध गराउन सकिने उहाँको भनाइ थियो ।

मन्त्री तिमल्सिनाले हुलाक सेवाको विद्यमान क्षमता र सीमालाई ध्यानमा राख्दै उपलब्ध स्रोतसाधनको अधिकतम उपयोग गर्न आग्रह गर्नुभयो । सिमकार्ड वितरणमा लाग्ने समय र सेवाग्राहीको प्रतिक्रियाको मूल्याङ्कन गरी आवश्यक सुधार गर्दै जानुपर्ने उहाँले बताउनुभयो ।

सरकारी स्वामित्वका नेपाल टेलिकम र हुलाक सेवा विभागबीचको सहकार्यले टेलिकमका सेवा नागरिकको पहुँचमा पुर्‍याउन सहज हुने विश्वास मन्त्री तिमल्सिनाले व्यक्त गर्नुभयो । यसबाट नेपाल टेलिकमका ग्राहकले थप सुविधा पाउनुका साथै हुलाक सेवासमेत प्रभावकारी बन्ने उहाँको अपेक्षा छ ।

नागरिकलाई प्रभावकारी र गुणस्तरीय सेवा उपलब्ध गराउन राज्यका सबै निकायले समन्वय र सहकार्य गर्दै अघि बढ्नुपर्नेमा उहाँले जोड दिनुभयो ।