विदेश पठाउने भन्दै सात जनालाई ८१ लाख ठगी, मुख्य आरोपी काठमाडौंमा पक्राउ

वैदेशिक रोजगारीको आकर्षक सपना देखाएर सात जनाबाट ८१ लाख ५० हजार रुपैयाँ असुलेर फरार भएका एक व्यक्ति काठमाडौंमा पक्राउ परेका छन्। वैदेशिक रोजगारीमा राम्रो आम्दानी हुने काम मिलाइदिने प्रलोभनमा पारेर ठगी गरेको आरोपमा धनुषाका सहाबुद्दिन शेखलाई प्रहरीले पक्राउ गरेको हो।

जिल्ला प्रहरी कार्यालय रौतहटले बिहीबार सार्वजनिक गरेको विवरणअनुसार पक्राउ पर्नेमा धनुषाको जनकनन्दिनी गाउँपालिका–२, बलाहा निवासी करिब ४० वर्षीय शेख रहेका छन्।

प्रहरीका अनुसार शेखसहित चार जनाको समूहले शेख दरखसिद अनवरसहित सात जनालाई वैदेशिक रोजगारीमा पठाइदिने भन्दै विश्वासमा पारेको थियो। विदेशमा राम्रो कमाइ हुने कामको आश्वासन दिएर उनीहरूले पीडितहरूबाट मोबाइल बैंकिङ तथा विभिन्न बैंक खातामार्फत ८१ लाख ५० हजार रुपैयाँ लिएको आरोप छ।

रकम लिएपछि ठगीमा संलग्न रहेको आरोप लागेका व्यक्तिहरूविरुद्ध पीडितले जाहेरी दिएपछि प्रहरीले ठगी तथा आपराधिक विश्वासघातसम्बन्धी कसुरमा अनुसन्धान अघि बढाएको थियो। घटनापछि फरार रहेका शेखलाई काठमाडौं उपत्यका अपराध अनुसन्धान कार्यालय र जिल्ला प्रहरी कार्यालय रौतहटबाट खटिएको संयुक्त टोलीले असोज २७ गते काठमाडौं महानगरपालिका–१६ स्थित नयाँ बजारबाट नियन्त्रणमा लिएको हो।

जिल्ला प्रहरी कार्यालय रौतहटका प्रवक्ता डीएसपी बसन्त गौतमका अनुसार पक्राउ परेका शेखलाई रौतहट ल्याई प्रहरी हिरासतमा राखेर घटनाबारे थप अनुसन्धान भइरहेको छ। घटनामा संलग्न भनिएका अन्य व्यक्तिहरूको भूमिकाबारे भने प्रहरीले अनुसन्धान गरिरहेको छ।

वैदेशिक रोजगारीको नाममा ठगीबाट जोगिन आग्रह

वैदेशिक रोजगारीमा जाने नाममा ठूलो रकम बुझाएर ठगिने घटना बढिरहेका बेला प्रहरीले रोजगारीको प्रलोभनमा परेर हतारमा रकम नबुझाउन आग्रह गरेको छ। विदेश पठाइदिने वा आकर्षक तलबको काम मिलाइदिने आश्वासन दिने व्यक्ति तथा संस्थाको आधिकारिकता जाँच गरेर मात्रै आर्थिक कारोबार गर्न प्रहरीले सुझाव दिएको छ।