Жетісу мектептерінде буллингке тосқауыл қойылмақ

Жетісу облысында балалардың қауіпсіздігін қамтамасыз ету және мектептердегі құқық бұзушылықтың алдын алу мәселесі арнайы комиссия отырысында қаралды. Кезектен тыс жиын облыс әкімінің орынбасары Диас Есдәулетовтің төрағалығымен өтті. Басқосуда буллингке қарсы жұмысты күшейту және жауапты мекемелердің өзара іс-қимылын жетілдіру жолдары талқыланды , – деп жазады Ertenmedia.kz.

Отырысқа прокуратура мен полиция органдарының өкілдері, облыстық білім және балалардың құқықтарын қорғау басқармаларының басшылары қатысты. Аудан-қала әкімдерінің орынбасарлары, білім беру ұйымдарының басшылары мен қызметкерлері де жиынға шақырылды. Қатысушылар өңір мектептеріндегі қазіргі ахуалды саралап, балаларға төнуі мүмкін қауіптердің алдын алу тетіктерін қарастырды.

Комиссия мүшелері мектептегі буллингті балалар арасындағы қарапайым түсініспеушілік деп қабылдауға болмайтынын атап өтті. Қысымға ұшыраған оқушының мінез-құлқы өзгеріп, сабақ үлгерімі төмендеуі немесе ортадан оқшаулануы мүмкін. Мұндай белгілерді педагог, психолог және ата-ана ерте байқап, балаға уақытылы көмек көрсетуге тиіс.

Жиында білім беру мекемелеріндегі қауіпсіздік шаралары мен құқық бұзушылықтың алдын алуға жауапты қызметтердің жұмысы талданды. Балалардың құқығын қорғау тек мектеп әкімшілігінің міндеті ретінде қаралмай, мемлекеттік органдар мен отбасының ортақ жауапкершілігі болуы керектігі айтылды. Әсіресе буллинг дерегін жасырып қалмай, әр жағдайға заң аясында жедел әрекет ету қажеттігіне назар аударылды.

Отырыс қорытындысында жауапты мекемелер мен ұйымдардың басшыларына нақты тапсырмалар берілді. Олардың орындалуы бақылауға алынып, мектептердегі қауіпсіздік шараларын күшейту міндеті қойылды. Баланы қорғау қағаздағы есептен емес, қауіп белгісін дер кезінде байқап, үнсіз қалмаудан басталады.