Kòrsou por bira hub regional importante pa konekshon di Internèt

Region Karibe mester invertí fuerte den teknologia, edukashon i kolaborashon

WILLEMSTAD.- Resientemente a tuma lugá na Kòrsou e di 32 enkuentro di Caribbean Network Operators Group (CaribNOG 32). Esaki a tuma liga na Courtyard by Marriott, kaminda ekspertonan di e region aki i di otro paisnan a reuní pa papia tokante telekomunikashon, red di Internèt, seguridat digital, gobernashon digital i teknologia nobo.

E tema tabata “Resilience Ready: Strengthening the Caribbean Digital Core” . Esaki ta nifiká ku e region mester ta bon prepará pa interupshon i menasa, fortalesé su base digital. Durante di e konferensha a bini bon dilanti ku e region aki mester invertí mas den retnan digital mas fuerte, teknologia nobo, edukashon i mas kolaborashon.

Un punto importante ku a resaltá tabata ku Kòrsou ainda ta hasi relativamente tiki uso di Internet Protokòl vershon 6 (IPv6). Esaki ta e stándar nobo ku ta duna aparato un adrès riba Internèt. IPv6 ta nesesario pa sostené e kresementu di aparatonan konektá, servisionan di cloud i teknologia nobo. Segun e partisipante, Kòrsou mester implementá IPv6 mas lihé pa keda kompetitivo i prepará pa desaroyo digital futuro.

Edukashon i desaroyo di konosementu i abilidatnan tambe tabata tema importante. Loke tambe a resaltá ta, ku solamente invertí den infrastruktura no ta sufisiente. Mester tin profeshonalnan bon prepará ku por diseñá, manehá, protehá i mantené retnan digital moderno. Institutonan di edukashon, gobièrnu, outoridatnan di kontrol i kompania mester traha mas huntu pa forma mas hende ku ta eksperto den e área.

Otro punto esensial tabata konfiabilidat di kabelnan di Internèt bou di laman. A papia spesialmente tokante kabelnan ku realmente ta sigui ruta diferente. Tene mas kabel no ta garantisá konekshon konfiabel si tur dos ta bai mesun ruta, mes punto di ‘landfall’ òf mesun fasilidatnan. Kòrsou a sirbi komo ehèmpel pa mustra kon importante ta pa tin ruta independiente i un bon distribushon di infrastruktura.

Durante di e konferensha tambe a trata seguridat digital, artificial intelligence, protekshon di infrastruktura vital, routing di tráfiko di Internèt i gobernashon digital. Organisashonnan regional i internashonal, inkluso ICANN i LACNIC, a kompartí nan konosementu tokante desaroyonan den mundu di Internèt.

Un mensahe ku a keda bini bèk kada bia ta ku kolaborashon regional ta nesesario. Paisnan karibense hopi bia tin hopi mesun retonan: medionan limitá, dependensia di infrastruktura, menasanan digital i falta di konosementu tékniko spesialisá. Dor di kompartí konosementu, traha huntu pa forma eksperto i kordiná invershon den infrastruktura, paisnan por enfrentá e desafionan mihó.

Ku organisashon di CaribNOG 32, Kòrsou a demostrá ku e por krese pa bira un hub regional importante pa konekshon di Internèt i infrastruktura digital. Pa logra esaki, e isla mester sigui invertí: den infrastruktura físiko, teknologia nobo, formashon di hende, kolaborashon entre organisashonnan i bon gobernashon digital.

E mensahe prinsipal di CaribNOG 32 tabata kla: futuro digital di e region ta pidi mas ku solamente konekshon di Internèt. Mester tin retnan ku por resistí interupshon i menasa, teknologia moderno, profeshonal bon prepará i un esfuerso komun pa kolaborashon regional.

Pa Kòrsou, e bishita tabata un oportunidat pa mustra su potensial stratégiko. Mesora a keda kla tambe ki paso mester tuma pa tin un ekonomia digital fuerte i kompetitivo: implementá IPv6 mas lihé, fortalesé edukashon digital, sigurá ku kabelnan bou di laman tin ruta realmente diferente i traha mas serka ku partnernan regional.

The post Kòrsou por bira hub regional importante pa konekshon di Internèt appeared first on èxtra .