Pais ta pèrdiendo e bataya kontra kriminalidat

Cijntje ta hopi preokupá

WILLEMSTAD.- Parlamentario pa Partido Nashonal di Pueblo, Ruisandro Cijntje, ta hopi preokupá pa e situashon di kriminalidat na Kòrsou. Na su punto di bista, hustisia ta pèrdiendo e bataya kontra kriminalnan. Cijntje di profeshon ta un polis i tabata hefe di e departamentu di asuntunan interno di kuerpo polisial.

E ta bisa ku e situashon no ta di aworakí. Ta basta tempu kaba ta papiando di e problema ku pais tin pa atendé ku e grado haltu di kriminalidat. E ta sinti falta di un plan struktural.

“Loke ta mira ta plannan ‘ad hoc’, hopi propaganda, show i video. Pero, ta neglishá e dedikashon ku mester tin pa e trabou ku mester tuma lugá den kuerpo polisial. Falta di personal, material, i hèrmènt pa polisnan por traha kuné.”

Tambe Cijntje ta konstatá ku polisnan ta sinti pa hopi tempu kaba ku ta laga nan na kaya. “Nan no ta haña protekshon ora ku nan aktua den kayente di trabou. E polisnan aki a haña nan dilant’i wes kaminda ta tuma sanshon kontra nan.”

Konsekuensia di e situashonnan aki ta, segun Cijntje, ku e polisnan aki tambe ta hala atras pasobra nan tin ku pensa riba nan kas i famia. Esaki ta kousa ku kriminalidat ta haña mas kaminda pa manifestá i a kana yega kaminda e ta awe. “Ora e chèns pa gara kriminalnan bira tiki, e ta promové e komportashon kriminal. Mester hasi mas pa yega na material moderno pa polis traha kuné manera kámara i digitalisashon di sistemanan di trabou.”

Banda di esaki Cijntje ta mustra riba un situashon sosial penoso den pais. “Hende tin ku sobrebibí, i dado momentu ora no tin sèn den kas pa sobrebibí, e hende por kometé un akto kriminal pa e haña sèn.” Banda di esaki, Cijntje ta puntra su mes entretantu ku ta kometé aktonan kriminal pa kome so, òf pa hiba un otro nivel di bida.

E ta referí aki na loke hopi hende ta mira riba retnan sosial. “Nan tambe ke bai fiesta, keiru etc.” Na su opinion pues, e situashon a bira mas kompleho. En todo kaso e ta konstatá ku tin tiki programa i informashon pa traha riba konsientisashon i motivashon di siudadanonan i asina prevení kriminalidat.

Di e formanan aki mester krea situashonnan kaminda e siudadano ta sinti nan mes mas sigur. Na momentu ku komo pais kuminsá bisa ku ta e siudadano mester protehá nan propiedat mas mihó, e mensahe ku ta manda aki ta robes. “E ta komosifuera ku ta falta di e doño ku nan a hòrta su propiedat.”

Cijntje ta finalisá bisando ku ta e deterioro aki ta pone ku e hende ta sinti su mes impotente i ku e ta pèrdí riba tur tereno. “Gobièrnu i minister di Hustisia mester wak esaki hopi bon.” E parlamentario ta urgi pa traha mas riba prevenshon tambe den forma di alsa situashon sosial den barionan i alabes alsa nivel den enseñansa den pais.

The post Pais ta pèrdiendo e bataya kontra kriminalidat appeared first on èxtra .