Reunion tripartit awe pa trata diferente punto di agènda pisá

Entre Parlamentonan di Kòrsou, Aruba i St. Maarten

WILLEMSTAD.- E reunion tripartit entre e miembronan di e Komishon di Asuntunan di Reino, Relashonnan Interparlamentario i Relashonnan di Eksterior di e Parlamentonan di Kòrsou, Aruba i St. Maarten ta tuma lugá awe, djaweps 15 di òktober. For di 9or di mainta ta spera e parlamentarionan den sala di reunion di Parlamento. Despues ku presidente di Parlamento di Kòrsou, Fergino Brownbill, habri e reunion lo sigui un introdukshon kòrtiku di parti di e presidentenan di Parlamentonan di Aruba i St. Maarten.

Seguidamente lo atendé e diferente tópikonan ku tin riba agènda. Lo para ketu na palabrashonnan i puntonan di diskushon di e último reunion tripartit ku a tene dia 4 di yüni 2026 na De Haag, Hulanda. Despues lo tin un interkambio ku e komishon chikí ku a lanta pa a pasa den un konseho di Raad van State riba e proposishon di e paisnan den Karibe pa un areglo di disputa. Parlamento di Aruba tabata esun ku a trèk e trayekto pa entregá un proposishon nobo pa e areglo di disputa na gobièrnu di Reino.

Di parti di Kòrsou tin puntonan di prinsipio i fundamental ku no ta negoshabel pa yega na un areglo di disputa. Mas aleu, e delegashonnan lo para ketu na demas proposishonnan pa leinan di Reino. Ta trata aki spesífikamente di un proposishon di e parlamentario hulandes Renate den Hollander pa trese kambio di e Statüt di Reino pa asina hasi posibel ku Kòrsou i St. Maarten, meskos ku Aruba, por disidí unilateralmente si nan ta sali for di e órden hurídiko manera ta poné den e Statüt di Reino i alabes pone reglanan den kaso ku bini kambio den e konstitushon hulandes si un di e islanan BES disidí ku nan no ke forma parti mas di e konstelashon hulandes.

E último desaroyonan relashoná ku e areglo mutuo pa reforma i paketenan di pais tambe ta riba agènda pa e delegashonnan diskutí riba dje. E ròl di Kas Real den e negoshi di sklabitut i e moshon ku Parlamento di Kòrsou a pasa pa lanta un komishon di de-kolonisashon ta mas di e puntonan di agènda ku lo para ketu na dje. Esaki ku e meta pa durante reunionnan di IPKO duna atenshon struktural na e tópiko aki.

Finalmente e delegashonnan ta deseá di para ketu na e Konferensia di Reino ku ta tuma lugá dianan 17 i 18 di novèmber awor na St. Maarten. A tuma nota ku ta referí awor na un Kumbre di Reino (“Kingdom Summit”) ku ta un deliberashon entre e 4 paisnan den Reino Hulandes kaminda kada pais lo presentá un asina yamá “State of the Nation”. Tambe nan lo deliberá riba áreanan di maneho kaminda posiblemente por yega na kolaborashonnan nobo òf mas estrecho.

E delegashonnan parlamentario di Kòrsou, Aruba i St. Maarten lo diskutí riba e meta i balor agregá di e kumbre aki for di e punto di bista di e Parlamentonan di e paisnan outónomo den Reino Hulandes.

The post Reunion tripartit awe pa trata diferente punto di agènda pisá appeared first on èxtra .