FDI ជប៉ុនជំរុញបរិវត្តកម្មបៃតងក្នុងផលិតកម្មនៅវៀតណាម

ពិធីបុណ្យនំប៉័ងវៀតណាមឆ្នាំ ២០២៦ តភ្ជាប់ម្ហូបអាហារ វប្បធម៌ និងទីផ្សារជប៉ុន ជនជាតិវៀតណាមមានចំនួនជាង ៧៥% នៃពលករជំនាញជាក់លាក់លេខ ២ នៅជប៉ុន ការត្រួតពិនិត្យគុណភាពផលិតផលមុនពេលចេញពីរោងចក្រ នៅក្រុមហ៊ុន Vietonic សួនឧស្សាហកម្ម Dinh Tram ខេត្ត Bac Ninh។ វៀតណាមកំពុងក្លាយជាទីផ្សារដ៏សំខាន់ និងជាទីតាំងផលិតកម្មជាយុទ្ធសាស្ត្រនៅអាស៊ីអាគ្នេយ៍របស់សហគ្រាសជប៉ុនជាច្រើន។ ក្រៅពីទំហំទុន គម្រោងថ្មីៗក៏បានបង្ហាញឱ្យឃើញពីនិន្នាការវិនិយោគរយៈពេលវែងលើផលិតកម្មដែលមានតម្លៃបន្ថែមខ្ពស់ បច្ចេកវិទ្យា និងដំណោះស្រាយអភិវឌ្ឍន៍ប្រកបដោយចីរភាព។

យោងតាមនាយកដ្ឋានជំរុញពាណិជ្ជកម្ម នៃក្រសួងឧស្សាហកម្ម និងពាណិជ្ជកម្ម បច្ចុប្បន្នជប៉ុនមានគម្រោងជាង ៥.៨០០ ដែលកំពុងមានសុពលភាពនៅវៀតណាម ជាមួយនឹងទុនវិនិយោគសរុបជាង ៨១ ពាន់លានដុល្លារអាមេរិក។

កិច្ចព្រមព្រៀងពាណិជ្ជកម្មសេរីនានា បន្តបង្កើតលក្ខខណ្ឌអំណោយផលដល់សហគ្រាសនៃប្រទេសទាំងពីរ អំពីពន្ធគយ ក្បួនច្បាប់ស្តីពីប្រភពដើមទំនិញ និងកិច្ចសម្រួលពាណិជ្ជកម្ម ដែលតាមរយៈនោះ បានពង្រីកលទ្ធភាពចូលរួមក្នុងខ្សែច្រវាក់ផ្គត់ផ្គង់ និងបណ្តាញផលិតកម្មក្នុងតំបន់។

សាជីវកម្មជប៉ុនធំៗជាច្រើនដូចជា Honda, Panasonic, Kao Viet Nam, Sumitomo នៅតែបន្តរក្សា និងពង្រីកសកម្មភាពផលិតកម្មនៅវៀតណាម។ ទន្ទឹមនឹងនោះ គម្រោងថ្មីៗនៅតាមសួនឧស្សាហកម្មកំពុងតម្រង់ទិសកាន់តែខ្លាំងឆ្ពោះទៅរកបរិវត្តកម្មបៃតង និងដំណោះស្រាយឆ្លើយតបទៅនឹងតម្រូវការអភិវឌ្ឍន៍ប្រកបដោយចីរភាព។

ពីផលិតកម្ម ឆ្ពោះទៅបច្ចេកវិទ្យា និងសេដ្ឋកិច្ចវិលជុំ

គម្រោងថ្មីមួយ គឺរោងចក្រផលិតសម្ភារវេចខ្ចប់ប្រអប់ក្រដាសសម្លាប់មេរោគរបស់សាជីវកម្ម OJI ដែលត្រូវបានអនុវត្តក្រោមម៉ាកយីហោ Oji Liquid Pak (OLP) ជាមួយនឹងទុនវិនិយោគសរុប ១១០ លានដុល្លារអាមេរិក នៅសួនបច្ចេកវិទ្យាជាន់ខ្ពស់ Long Thanh ខេត្ត Dong Nai។

គម្រោងនេះបង្ហាញពីការប្តេជ្ញាចិត្តវិនិយោគរយៈពេលវែងរបស់ Oji Liquid Pak នៅវៀតណាម ព្រមទាំងដាក់ប្រទេសវៀតណាមស្ថិតក្នុងទិសដៅផលិតកម្ម និងការផ្គត់ផ្គង់ជាយុទ្ធសាស្ត្ររបស់សាជីវកម្មនៅអាស៊ីអាគ្នេយ៍។

យោងតាមទិសដៅរបស់សហគ្រាស គម្រោងនេះរួមចំណែកជំរុញដំណើរការផ្លាស់ប្តូរឆ្ពោះទៅរកដំណោះស្រាយវេចខ្ចប់វិលជុំ និងឆ្លើយតបទៅនឹងតម្រូវការថ្មីៗនៃគោលនយោបាយ។

លោក Nguyen Quoc An អនុប្រធាន និងជាតំណាងគណៈគ្រប់គ្រងបណ្តាសួនឧស្សាហកម្ម និងតំបន់សេដ្ឋកិច្ច Dong Nai បានចាត់ទុកថា គម្រោងខ្នាតធំដូចខាងលើមិនត្រឹមតែរួមចំណែកដល់ការអភិវឌ្ឍឧស្សាហកម្មក្នុងមូលដ្ឋានប៉ុណ្ណោះទេ ប៉ុន្តែថែមទាំងបង្កើតឱកាសបន្ថែមក្នុងការលើកកម្ពស់សមត្ថភាពផលិតកម្មក្នុងស្រុក និងបង្កើនការចូលរួមរបស់វៀតណាមទៅក្នុងខ្សែច្រវាក់ផ្គត់ផ្គង់ក្នុងតំបន់ផងដែរ។

គណៈគ្រប់គ្រងបានសន្យាបន្តរួមដំណើរ និងគាំទ្រវិនិយោគិនក្នុងដំណើរការអនុវត្តគម្រោង; ណែនាំឱ្យបានទាន់ពេលវេលា និងសហការដោះស្រាយការលំបាក បញ្ហាស្មុគស្មាញនានា ដើម្បីឱ្យគម្រោងដំណើរការស្របតាមបទប្បញ្ញត្តិ និងឆាប់ឈានចូលប្រតិបត្តិការជាផ្លូវការ។

លោក Kestutis Sliuzas អគ្គនាយកក្រុមហ៊ុន Oji Liquid Pak បានយល់ឃើញថា វិស័យផលិតកម្មជាច្រើន ក្នុងនោះមានវិស័យសម្ភារវេចខ្ចប់ កំពុងផ្លាស់ប្តូរទៅរកស្តង់ដារថ្មី ដែលក្នុងនោះ ប្រសិទ្ធភាពការងារ សុវត្ថិភាពចំណីអាហារ ភាពបត់បែនក្នុងប្រតិបត្តិការ និងសេដ្ឋកិច្ចវិលជុំ ចាំបាច់ត្រូវតែអនុវត្តទន្ទឹមគ្នា។

រោងចក្រ Oji Liquid Pak រួមបញ្ចូលសកម្មភាពផលិតកម្មសម្ភារវេចខ្ចប់បម្រើឱ្យវិស័យម្ហូបអាហារ ជាមួយនឹងការស្រាវជ្រាវ និងការអភិវឌ្ឍ សេវាបច្ចេកទេស ការដំឡើង និងការថែទាំគ្រឿងម៉ាស៊ីន ដែលតាមរយៈនោះ បានតម្រង់ទិសឆ្ពោះទៅរកបរិយាកាសផលិតកម្មទំនើប មានគុណភាព និងតម្លៃបន្ថែមខ្ពស់។

យោងតាមអ្នកជំនាញមួយចំនួន ចរន្តទុន FDI របស់ជប៉ុននាពេលបច្ចុប្បន្ន មិនត្រឹមតែផ្តោតលើផលិតកម្មប៉ុណ្ណោះទេ ប៉ុន្តែថែមទាំងពង្រីកទៅកាន់ការស្រាវជ្រាវ និងការអភិវឌ្ឍក្នុងវិទ្យាសាស្ត្រធម្មជាតិ; ការជួសជុល ថែទាំ ដំឡើងគ្រឿងម៉ាស៊ីន និងបរិក្ខារ; ការនាំចេញ-នាំចូល និងការចែកចាយទំនិញ ស្របតាមបទប្បញ្ញត្តិនៃច្បាប់របស់វៀតណាម។

វិស័យទាំងនេះស្របគ្នានឹងទិសដៅអភិវឌ្ឍន៍សួនឧស្សាហកម្មក្នុងដំណាក់កាលថ្មី។

លោក Tran Viet Ha អនុប្រធានគណៈគ្រប់គ្រងបណ្តាតំបន់កែច្នៃនាំចេញ និងសួនឧស្សាហកម្មទីក្រុងហូជីមិញ (HEPZA) បានឱ្យដឹងថា ស្ថាប័ននេះកំពុងផ្តោតលើការបង្កើតលក្ខខណ្ឌអំណោយផល ដើម្បីឱ្យវិនិយោគិនឆាប់អនុវត្តគម្រោងបន្ទាប់ពីបានចុះបញ្ជីរួចរាល់ ដោយកាត់បន្ថយនីតិវិធីពាក់ព័ន្ធនឹងការរៀបចំផែនការ និងសំណង់។

ចំពោះបញ្ហាទាំងឡាយដែលស្ថិតក្រោមសមត្ថកិច្ច HEPZA នឹងដោះស្រាយដោយផ្ទាល់; រីឯខ្លឹមសារអន្តរវិស័យ នឹងត្រូវសហការគ្នាដោះស្រាយ។ វិធីសាស្ត្រគ្រប់គ្រងក៏ត្រូវបានតម្រង់ទិសផ្លាស់ប្តូរពីការផ្តោតលើការដោះស្រាយនីតិវិធីរដ្ឋបាល ទៅជាការតាមដានជាប់ជាប្រចាំនូវដំណើរការគម្រោងទាំងមូល ចាប់តាំងពីដំណាក់កាលត្រៀមវិនិយោគ រហូតដល់ពេលដំណើរការជាផ្លូវការ។

សេចក្តីសម្រេចចិត្តលេខ ១០-NQ/TW ចុះថ្ងៃទី ៨ ខែមិថុនា ឆ្នាំ ២០២៦ របស់ការិយាល័យនយោបាយ ស្តីពីការអភិវឌ្ឍសេដ្ឋកិច្ចដែលមានទុនវិនិយោគពីបរទេស បានកំណត់ការផ្លាស់ប្តូរការយកចិត្តទុកដាក់ក្នុងការទាក់ទាញការវិនិយោគពីបរិមាណទៅជាគុណភាព ដោយផ្តល់អាទិភាពដល់ការវិនិយោគដែលផ្សារភ្ជាប់នឹងបច្ចេកវិទ្យាជាន់ខ្ពស់ ការច្នៃប្រឌិតថ្មី ការអភិវឌ្ឍធនធានមនុស្ស និងការផ្ទេរបច្ចេកវិទ្យា។

យោងតាមទិសដៅនេះ វៀតណាមតម្រង់ទិសឆ្ពោះទៅរកការទាក់ទាញសកម្មភាពវិនិយោគដែលមានតម្លៃបន្ថែមខ្ពស់ និងផ្អែកលើបច្ចេកវិទ្យា ជំនួសឱ្យការផ្តោតលើសកម្មភាពផ្គុំតម្លើងសាមញ្ញដោយពឹងផ្អែកលើកម្លាំងពលកម្មតម្លៃថោក។

ផ្សារភ្ជាប់ការវិនិយោគជាមួយទំនួលខុសត្រូវសង្គម

ទន្ទឹមនឹងតម្រូវការលើកកម្ពស់គុណភាពនៃចរន្តទុន សួនឧស្សាហកម្មជាច្រើននៅទីក្រុងហូជីមិញ និង Dong Nai កំពុងផ្តល់អាទិភាពដល់គម្រោងដែលប្រើប្រាស់បច្ចេកវិទ្យាទំនើប បង្កើតតម្លៃបន្ថែមខ្ពស់ ប្រើប្រាស់ដីធ្លីប្រកបដោយប្រសិទ្ធភាព មេត្រីភាពចំពោះបរិស្ថាន និងមានសមត្ថភាពលើកកម្ពស់តួនាទីរបស់មូលដ្ឋាននៅក្នុងខ្សែច្រវាក់ផ្គត់ផ្គង់ក្នុងស្រុក និងសកលលោក។

នៅក្នុងដំណើរការនេះ ទំនួលខុសត្រូវរបស់សហគ្រាសចំពោះបរិស្ថាន និងសហគមន៍ក៏ត្រូវបានយកចិត្តទុកដាក់កាន់តែខ្លាំងឡើងផងដែរ។

លោក ONO Masuo អគ្គកុងស៊ុលជប៉ុនប្រចាំទីក្រុងហូជីមិញ បានវាយតម្លៃថា ក្រៅពីផលិតកម្ម សកម្មភាពរួមចំណែកដល់សហគមន៍របស់សហគ្រាសជប៉ុននាពេលកន្លងមក បានរួមចំណែកធ្វើឱ្យកាន់តែស៊ីជម្រៅថែមទៀតនូវទំនាក់ទំនងរវាងវៀតណាម និងជប៉ុន។

ឧទាហរណ៍ជាក់ស្តែងមួយគឺក្រុមហ៊ុន Kao Viet Nam។ ក្រៅពីសកម្មភាពផលិតកម្ម និងអាជីវកម្ម សហគ្រាសនេះបានអនុវត្ត «កម្មវិធីអភិវឌ្ឍន៍អនាម័យរបស់ Kao Viet Nam» ចាប់តាំងពីឆ្នាំ ២០១៨ សំដៅរួមចំណែកកែលម្អអនាម័យ ការពារសុខភាព និងលើកកម្ពស់គុណភាពជីវិត។

ថ្មីៗនេះ ក្រុមហ៊ុន Kao Viet Nam បានបន្តផ្តួចផ្តើម «កម្មវិធីបង្កើនការថែទាំសុខាភិបាល៖ លើកកម្ពស់សុខភាពសម្រាប់ពលការិនីនៅតាមបណ្តាសួនឧស្សាហកម្ម»។

កម្មវិធីនេះត្រូវបានអនុវត្តដោយអង្គការអន្តរជាតិទេសន្តរប្រវេសក៍ (IOM) ដោយមានការសម្របសម្រួលពីអង្គភាពអង្គការសហប្រជាជាតិដើម្បីសមភាពយេនឌ័រ និងការពង្រឹងសិទ្ធិអំណាចដល់ស្ត្រី (UN Women) បណ្តាស្ថាប័នរដ្ឋាភិបាល អង្គភាពសុខាភិបាល និងភាគីពាក់ព័ន្ធនានានៅកន្លែងធ្វើការ។

យោងតាមលោក ONO Masuo ទន្ទឹមនឹងគោលដៅកំណើនសេដ្ឋកិច្ចឆ្ពោះទៅកាន់ឆ្នាំ ២០៣០ វៀតណាមកំពុងធ្វើឱ្យល្អឥតខ្ចោះជាបណ្តើរៗនូវយន្តការស្ថាប័ន ហេដ្ឋារចនាសម្ព័ន្ធ ព្រមទាំងជីវភាពរស់នៅ និងបរិយាកាសការងាររបស់ប្រជាជននៅតែបន្តមានការផ្លាស់ប្តូរ ក្នុងនោះមានតម្រូវការធានានូវផលប្រយោជន៍ស្របច្បាប់របស់ពលករផងដែរ។

លោក Shintaro Yasue អគ្គនាយកក្រុមហ៊ុន Kao Viet Nam បានឱ្យដឹងថាសហគ្រាសបានចាប់ផ្តើមប្រតិបត្តិការនៅវៀតណាមតាំងពីឆ្នាំ ១៩៩៦ ហើយឆ្នាំ ២០២៦ នេះ គឺជាការគូសបញ្ជាក់នូវខួប ៣០ ឆ្នាំ នៃវត្តមានរបស់ខ្លួននៅលើទីផ្សារនេះ។

នៅលើកំណាត់ផ្លូវបន្តបន្ទាប់ទៀត Kao Viet Nam មានបំណងបន្តបង្កើតតម្លៃថ្មីជូនដល់អ្នកប្រើប្រាស់ មិនត្រឹមតែតាមរយៈផលិតផល និងម៉ាកយីហោប៉ុណ្ណោះទេ ប៉ុន្តែថែមទាំងតាមរយៈគំនិតផ្តួចផ្តើមនានាដែលរួមចំណែកដោះស្រាយបញ្ហាសង្គមនៅវៀតណាមផងដែរ។

យោងតាមលោក ការលើកកម្ពស់ការទទួលខុសត្រូវរបស់សហគ្រាស និងការបង្កើនការរួមចំណែកដល់សហគមន៍ គឺជាផ្នែកមួយនៅក្នុងទិសដៅអភិវឌ្ឍន៍យូរអង្វែង និងប្រកបដោយចីរភាព។

នៅទីក្រុងហូជីមិញ ជាទីកន្លែងដែលមានស្ត្រីយ៉ាងច្រើនកុះករចូលរួមក្នុងកម្លាំងពលកម្ម និងសកម្មភាពសង្គម សហគមន៍សហគ្រាសផលិតកម្មក៏អាចអភិវឌ្ឍបន្ថែមនូវគំនិតផ្តួចផ្តើមនានា សំដៅកែលម្អសុខភាព និងគុណភាពជីវិតរបស់ពលការិនី ដែលតាមរយៈនោះ បានជួយឱ្យពលករមានភាពកក់ក្តៅក្នុងចិត្តក្នុងការបំពេញការងារ និងលើកកម្ពស់ប្រសិទ្ធភាពផលិតកម្ម៕

វៀតណាមស្នើឡើងនូវអាទិភាពចំនួន ៥ ដើម្បីបង្កើតកម្លាំងចលករថ្មីសម្រាប់កិច្ចសហប្រតិបត្តិការមេគង្គ - ជប៉ុន យុគសម័យ - នៅក្នុងកិច្ចប្រជុំរដ្ឋមន្ត្រីការបរទេសកិច្ចសហប្រតិបត្តិការមេគង្គ - ជប៉ុនលើកទី ១៧ នាថ្ងៃទី ២២ ខែកក្កដា នៅទីក្រុងម៉ានីល (ប្រទេសហ្វីលីពីន) សមាជិកការិយាល័យនយោបាយ និងជារដ្ឋមន្ត្រីក្រសួងការបរទេស លោក Le Hoai Trung បានស្នើឡើងនូវការយកស្មារតី “រួមគ្នាបង្កើត” ធ្វើជាទិសដៅ ដោយផ្តោតលើវិស័យចំនួន ៥ ចាប់តាំងពីការភ្ជាប់ទំនាក់ទំនងហេដ្ឋារចនាសម្ព័ន្ធរូបវន្ត ខ្សែច្រវាក់ផ្គត់ផ្គង់ រហូតដល់ការផ្លាស់ប្តូរឌីជីថល ការគ្រប់គ្រងធនធានទឹក និងសន្តិសុខបណ្តាញអ៊ីនធឺណិត។

ប្រជាជនវៀតណាមនៅប្រទេសជប៉ុនជួយសង្គ្រោះមនុស្ស និងជួយឧបត្ថម្ភស្បៀងអាហារបន្ទាប់ពីរញ្ជួយដីនៅខេត្ត Kumamoto យុគសម័យ - ពលករវៀតណាមចំនួន ៥ នាក់ បានរួមជាមួយប្រជាជនក្នុងស្រុក ជួយសង្គ្រោះលោកយាយម្នាក់ អាយុជិត ៩០ ឆ្នាំ ចេញពីផ្ទះដែលបានបាក់រលំ នៅទីក្រុង Yatsushiro (ខេត្ត Kumamoto ប្រទេសជប៉ុន)។ បណ្តាស្ថាប័នតំណាង សមាគម និងអ្នកស្ម័គ្រចិត្តវៀតណាម ក៏បានប្រញាប់ប្រញាល់ដឹកជញ្ជូនស្បៀងអាហារ និងទឹកបរិភោគ ទៅកាន់បណ្តាតំបន់ដែលរងផលប៉ះពាល់ ដោយសារការរញ្ជួយដី នៅខេត្ត Kumamoto។