रानीपोखरीमा तैरिरहेको अवस्थामा पुरुषको शव फेला

काठमाडौं । काठमाडौंको रानीपोखरीबाट मृत अवस्थामा रहेको एक पुरुषको शव निकालिएको छ। २०८३ असोज २८ गते राति काठमाडौं महानगरपालिका–२८ स्थित रानीपोखरीको पानीमा करिब ३५ देखि ४० वर्ष उमेरका पुरुषको शव तैरिरहेको सूचना प्राप्त भएपछि नेपाल प्रहरी विपद् प्रतिकार्य तथा तालिम केन्द्रबाट उद्धार टोली घटनास्थलमा पुगेको थियो।

प्रहरी निरीक्षकको कमान्डमा २५ जनाको विपद् उद्धार टोली आवश्यक उद्धार सामग्रीसहित घटनास्थलमा खटिएको थियो। टोलीले पानीमा तैरिरहेको शव उद्धार गरेको हो।

उद्धारपछि आवश्यक कानुनी प्रक्रिया पूरा गर्न तथा पोस्टमार्टमका लागि शवलाई महाराजगञ्जस्थित त्रिभुवन विश्वविद्यालय शिक्षण अस्पताल पठाइएको प्रहरीले जनाएको छ। मृतकको पहिचान र मृत्युको कारणबारे भने उपलब्ध विवरणमा खुलाइएको छैन।