BOC, nagbabala laban sa love scams; 700 reklamo, natanggap

Muling nagbabala ang Bureau of Customs (BOC) laban sa love scams matapos makatanggap ng mahigit 700 reklamo mula Enero, o average na 70 reklamo kada buwan.

Ayon kay BOC Commissioner Ariel Nepomuceno, karaniwang gumagamit ang mga scammer ng pekeng romantic relationships para makuha ang tiwala ng biktima bago humingi ng pera.

Sa modus, nagpapadala muna umano ang mga scammer ng pera o regalo, pero kalaunan ay hihingan ang biktima ng bayad para ma-claim ang ipinadalang package.

Nagpapanggap din ang ilan na may problema sa parcel o hawak ito ng airport authorities, at gumagamit ng pekeng tracking details at mga larawang gawa-gawa para mapaniwala ang biktima.

Pinayuhan ng BOC ang publiko na mag-isip muna bago magpadala ng pera sa bagong kakilala at beripikahin ang resibo, package tracking details at courier sa opisyal na parcel tracking system ng ahensiya.

Maaari ring tingnan ang listahan ng accredited sea freight forwarders ng Department of Trade and Industry (DTI) upang matiyak na lehitimo ang courier o shipment.

Follow SMNI NEWS in Twitter

The post BOC, nagbabala laban sa love scams; 700 reklamo, natanggap appeared first on SMNI NEWS CHANNEL .