ថៃ កំពុងតាមដាន ករណីជនជាតិខ្លួន ៩នាក់ ត្រូវប៉ូលិសហុងកុង ចាប់បាន ពាក់ព័ន្ធបណ្តាញជួញដូរផ្លូវភេទ ឆ្លងដែន
ប្រទេសថៃ កំពុងតាមដានយ៉ាងដិតដល់ នូវករណីជនជាតិខ្លួន ៩នាក់ ស្ថិតក្នុងចំណោមមនុស្ស ១៦នាក់ដែលត្រូវចាប់បាន នៅទីក្រុងហុងកុង ក្នុងប្រតិបត្តិការ បំបែកសម្បុក នៃបណ្តាញជួញដូរផ្លូវភេទឆ្លងដែនមួយ។
(រូប៖ ប៉ូលិសហុងកុង)
អ្នកនាំពាក្យរង នៃស្នងការដ្ឋាននគរបាលជាតិថៃ លោក Song-ek Patcharawit ត្រូវបានដកស្រង់សម្តីដោយ Khaosod ដែលថ្លែងកាលពីថ្ងៃទី១៣ ខែតុលា ឆ្នាំ២០២៦ ថា កងកម្លាំងនគរបាលហុងកុង បានបញ្ជាក់ពីព័ត៌មានលម្អិតជុំវិញប្រតិបត្តិការបង្ក្រាប ការចាប់ខ្លួន និងវត្ថុតាង ដែលត្រូវបានដកហូត ក្នុងអំឡុងពេលស៊ើបអង្កេត ហើយនគរបាលថៃ នឹងបន្តចែករំលែកព័ត៌មានជាមួយអាជ្ញាធរហុងកុង ដោយផ្តោតជាសំខាន់ លើតួនាទីរបស់បុគ្គលពាក់ព័ន្ធ និងខ្សែរយៈលំហូរហិរញ្ញវត្ថុដែលមានទំនាក់ទំនងមកកាន់ប្រទេសថៃ។
លោកបន្តថា ការស៊ើបអង្កេតនេះ មានគោលបំណងកំណត់អត្តសញ្ញាណ និងចាត់វិធានការផ្លូវច្បាប់ប្រឆាំងនឹងជនសង្ស័យ ដែលជាបក្សពួកកំពុងធ្វើសកម្មភាពនៅក្នុងប្រទេសថៃ។
(រូប៖ ប៉ូលិសហុងកុង)
សូមជម្រាបថា នៅក្នុងប្រតិបត្តិការបង្ក្រាប កាលពីថ្ងៃទី ៨ និង ៩ ខែតុលា, ប៉ូលិសហុងកុង បានបំបែកបណ្តាញនេះ ដោយស៊ើបអង្កេតរកឃើញថា ក្រុមមេខ្យល់ បានកំណត់គោលដៅលើស្ត្រីជនជាតិថៃ ដោយល្បួងពួកគេ ហើយរៀបចំការធ្វើដំណើរទៅកាន់ទីក្រុងហុងកុង ថែមទាំងរ៉ាប់រងថ្លៃស៊ីចាយ និងស្នាក់នៅផងដែរ ដើម្បីជួបអតិថិជន។
តាមការផ្សាយរបស់ South China Morning Post , ក្រុមមេខ្យល់ បានប្រើប្រាស់ Group Chat នៃកម្មវិធី Telegram ដើម្បីផ្សាយពាណិជ្ជកម្មសេវាផ្លូវភេទ ខណៈសកម្មភាព ភាគច្រើនគឺធ្វើឡើងនៅសណ្ឋាគារ ស្ថិតក្នុងតំបន់ Tsim Sha Tsui (ជីម សាចូយ) ដែលជាតំបន់ពាណិជ្ជកម្មដ៏មមាញឹក របស់ទីក្រុងហុងកុង។
(រូប៖ ប៉ូលិសហុងកុង)
ក្នុងប្រតិបត្តិការនោះ សមត្ថកិច្ចបានចាប់ខ្លួនមេខ្យល់បង្គោល ៤ នាក់ (ជនជាតិហុងកុង ៣ នាក់ និងថៃ ១ នាក់) ក្រោមបទចោទប្រកាន់ជួញដូរមនុស្ស និងលាងលុយ ព្រមទាំងដកហូត និងបង្កកប្រាក់ប្រមាណ ១៨លានដុល្លារហុងកុង ស្មើនឹងជិត ២លាន ៣០ម៉ឺនដុល្លារអាមេរិក។
ចំណែក ស្ត្រីជនជាតិថៃចំនួន ៩ នាក់ ដែលត្រូវចាប់បាន ពាក់ព័ន្ធករណីនេះ គឺមានអាយុចន្លោះពី ១៩ ដល់ ៣៣ ឆ្នាំ ខណៈទីក្រុងបាងកក ក៏កំពុងស៊ើបអង្កេត និងបន្តតាមដាន៕
អត្ថបទ៖ សុវណ្ណ
ថៃ បង្ក្រាប Scam ទ្រង់ទ្រាយធំ ចាប់បាន Scammer ៣៩នាក់ តែសឹងទាំងអស់ គឺជាជនជាតិខ្លួនឯង
The post ថៃ កំពុងតាមដាន ករណីជនជាតិខ្លួន ៩នាក់ ត្រូវប៉ូលិសហុងកុង ចាប់បាន ពាក់ព័ន្ធបណ្តាញជួញដូរផ្លូវភេទ ឆ្លងដែន appeared first on Kampuchea Thmey Daily .
The full article is being collected. Available text is shown for now.